Helburuak

Enplegua dela iruditzen zaigu gizarteratzea eta normalizazio soziala lortzeko atea.

Hala ere, zigor edo espetxe arazoak dituztenek lan merkatuan sartzeko oztopo eta zailtasun ugariei aurre egin beharra dute: prestakuntza profesional eskasa dute edo prestakuntzarik ez dute, lan-esperientziarik ez dute, lan merkatua ez dute ezagutzen, toxikomania arazoak dituzte, preso egotearen eraginez ondorio fisiko eta psikologiko espezifikoak dituzte...

Horregatik Zubiko Elkartean zailtasun hauek gainditzeko laguntza espezifikoa eta integrala eskaintzen diegu pertsona hauei, zailtasunak gaindi ditzaten eta gure lana ondorengo xede nagusien arabera bideratzen dugu:

• Gizartean baztertuta edo baztertzeko arriskuan daudenei (bereziki zigor edo espetxe arazoak dituztenei) eta beraien ingurukoei gizarteratzeko eta lanean hasteko aukera ematea, lan merkatuan sartzen eta egonkortasuna lortzen lagunduz.
• Talde honek gizartean eta lanean egoera normalizatu nahi duenean dituen arazoak jendeari ezagutzera ematea, komunitateko eragile sozial guztiak (erakundeak, enpresariak, gizarte ehuna...) berdintasunean eta zuzentasunean oinarritutako gizarte bat eraikitzen inplikatu daitezen.